Акафист Пресвятой Богородице "Одигитрия Ополченная"

 

Кондак 1

 

Взбранной Воеводе Победительная, яко от злых обуреваемии, умильно к Тебе притекаем, Богородице, но яко имущая державу непобедимую, от супостат нас благомощно защити и во бранех победу даруй, да зовем Ти: Радуйся, Путеводительнице «Ополченная», верных во бранех Заступление!

 

Икос 1

 

Ангелов множество предстоят Господеви, супротив злых сил ополчающеся, обаче никтоже от земных возможе я во бранех одолети, аще бы всемощная милость Пречистыя Владычицы не споборала нам присно, в бегство полки сопротивных обращющи, темже вопием:

 

Радуйся, Всемощная Заступнице наша,

Радуйся, Всемилостивая Предстательнице,

Радуйся, теплая о нас пред Богом Ходатаице,

Радуйся, Ея же трепещут полки чуждих,

Радуйся, немощным силу подающая,

Радуйся, сильным благомощие дарующая,

Радуйся, Путеводительнице «Ополченная», верных во бранех Заступление!

 

 

Кондак 2

 

Видяще люди православныя восстающее на них бед множество, трепетом одержими бяху, обаче не отчаяшася, но с теплою верою прибегаху к Богородице, вопиюще: Аллилуия.

 

Икос 2

 

Разум земных изнеможе и сердце оскуде, егда злоба вражия обступи страны православныя, верных же сердца укрепишася надеждою, да с верою зовут:

 

Радуйся, любовию к роду человеческому исполненная,

Радуйся, Надеждо наша непостыдная,

Радуйся, к Любви Превечной – Сыну Своему путем узким нас ведущая,

Радуйся, тяготу пути сего благодатию облегчающая,

Радуйся, раны елеем милости Твоея умащающая,

Радуйся, лишенных утешений века сего тайным веселием возвеселяющая,

Радуйся, Путеводительнице «Ополченная», верных во бранех Заступление.

 

Кондак 3

 

Сила Вышняго осени христолюбивое воинство, егда, молитву творяще, на смерть, аки на пир брачный, выступаше, не щадя живота своего, преднося икону Богоматере. Бог же Всесильный , хотя ему победу даровати, рассея полки чуждих, верныя же пояху: Аллилуия.

 

Икос 3

 

Имуще теплое к Пречистей любление, аки чада к Матери, навыкоша людие Божии пред образом Пречистыя молитися, тайнам Царствия Небесного поучаяся, благодарственно взываюху:

 

Радуйся, Покровом Твоим Царьград от нашествия руссов, аки тучею грозною, покрывшая,

Радуйся, светлейший солнца свет веры Христовы им нежданно явившая,

Радуйся, образом «Стены Нерушимыя» храм Софии Киевския чудно освятившая,

Радуйся, сим заступление Свое Земле Русской обетовавшая,

Радуйся, иконою «Владимирскою» пределы Московския благословившая,

Радуйся, пленению от иноплеменных сим древним образом на реце Угре предел положившая,   

Радуйся, Путеводительнице «Ополченная», верных во бранех Заступление.

 

Кондак 4

 

Ярость вражия бури многия на Русь православную насылаше, обаче вера истинная возрасташе в скорбех, и просияша сонмы святых, за ны во Царствии Небеснем предстоящих и Господеви вкупе с Пречистою Его Материю поющих: Аллилуия!

 

Икос 4

 

Слышаша вернии, како от века заступаше Пречистая Богородица страну нашу, воспрянуша духом и дерзаша в служении Господеви, воспевая:

 

Радуйся, царей величие,

Радуйся, пастырей святыня,

Радуйся, воинов мужество,

Радуйся, тружеников бодросте,

Радуйся, учителей премудросте,

Радуйся, чад воспитание,

Радуйся, Путеводительнице «Ополченная», верных во бранех Заступление.

 

Кондак 5

 

Боготечною звездою путеводною явися благодать Твоя, Владычице, нам, немощным, озаряюще путь тесный, скорбьми и трудами страсти очищющи и заступлением дивным вере научющи, да поем разумно: Аллилуия.

 

Икос 5

 

Видеша людие, како чрез икону Твою «Одигитрию», апостолом Лукою написанную и на Русь принесенною, спобораеши во бранех чтущим Тя, потщашася списаниями ея землю свою оградити, да путеводствуеши им во бранех и в делех мирных, зовущим:  

 

Радуйся, к вере православной приведение,

Радуйся, заблуждающих вразумление,

Радуйся, пленных свобождение,

Радуйся, алчущих насыщение,

Радуйся, градов устроение,

Радуйся, храмов украшение,

Радуйся, Путеводительнице «Ополченная», верных во бранех Заступление.

 

Кондак 6

 

Проповедницы славы Твоея, Пречистая, явишася летописцы древния и новыя, о чудесех милосердия Твоего поведавшия, како во бранех чад Своих заступаеши и малому воинству их силу сопротив сонмов вражиих подаеши, токмо да веру истинную хранят и живота своего не щадят, мы же, дивяся сему, благодарственно предстоим образу Твоему, воспевая присно: Аллилуия.

 

Икос 6

 

Возсия слава Земли Русския во вселенней, и распространися от моря до моря, и славяху окрестныя народы силу царя православного и мудрость народа христоименитаго, злыя же завистию одержими бяху и козни творяху, обаче не премогоша глаголющих благодарственно:

 

Радуйся, Небесная Славо,

Радуйся, земных благ обилие,

Радуйся, монашествующих преспеяние,

Радуйся, семейств добрых единомыслие,

Радуйся, болезней исцеление,

Радуйся, душам спасение,

Радуйся, Путеводительнице «Ополченная», верных во бранех Заступление.

 

Кондак 7

 

Хотяще землю отцев и язык свой заступити, ополчашеся людие русския, не токмо мужи, но и жены, сопротив нашествий иноплеменных, Покрову Богоматере себе вверяя, вопиюще присно: Аллилуия.

 

Икос 7

 

Показа Господь землю Русскую уделом Своим избранным, освятив ю верою правою, храмами и обительми украсив и иконами Пречистыя Своея Матери благословив, Ейже мы воспеваем, Промыслу сему дивящеся:

 

Радуйся, с Тихвинскою иконою Твоею, на воздусех чудне носимою, благословение Цареграда древняго на Русь перенесшая,

Радуйся, образом Честнаго Успения Твоего обитель Печерскую во граде Киеве утвердившая и сонм преподобных в ней возрастившая,

Радуйся, образом Знамения, вражиим мечем рассченным и паки целым бывшим, падение и восстание Царства Русского предрекшая,

Радуйся, образом Иверския Вратарницею царств земнаго и небеснаго Себе показавшая,

Радуйся, иконою Смоленскою Ополченною людям русским сопротив нашествий безбожных язык предводительствовавшая,

Радуйся, иконою Державною промышление Свое о стране нашей присно возвестившая,

Радуйся, Путеводительнице «Ополченная», верных во бранех Заступление.

 

Кондак 8

 

Странное и страшное бысть на Руси: егда за оскудение благочестия предаде Господь ю на испытание огненное, да воспрянут верные от сна греховного, души за Христа предающе, молитвенно вопиюще: Аллилуия.

 

 

Икос 8

 

Весь Еси милосердие, Господи, весь Еси любы неизреченная, обаче предаеши чад Твоих на скорби временныя, да в вечности спасение улучат. Темже молят Тя святии вси с Пречистою Твоею Материю, да укрепиши овцы Церкви Твоея, от волков угрызаемыя, и обратиши к истине заблудшия. Мы же, поклоняющеся иконе Богоматерней, взываем:

 

Радуйся, в молитве о нас присно Господеви предстоящая,

Радуйся, чаянием благ вечных земную скудость презирати научающая,

Радуйся, в годы гонений от безбожных Церковь Русскую не оставившая,

Радуйся, чад ея, в заточениях и изгнаниях горцых сущих, сохранявшая,

Радуйся, скорби им дивно благодатию услаждавшая,

Радуйся, души за Христа пострадавших на руце Твои Матерне приемшая,

Радуйся, Путеводительнице «Ополченная», верных во бранех Заступление.

 

Кондак 9

 

Всякое естество ангельское удивися, како соблюде Господь Церковь Свою посреде гонений лютых, и не отступи Покров Пречистыя от страны нашея, да поем, благодаряще: Аллилуия.

 

Икос 9

 

Вития многовещанныя, яко рыбы безгласныя, изрещи не могут, како заступление Богоматере спасает и отчаянных, приводя к покаянию заблуждающих, да поем умиленно:

 

Радуйся, грехов наших очищение,

Радуйся, разума просвещение,

Радуйся, в молитве наставление,

Радуйся, о спасении умоление,

Радуйся, крепосте благаго изволения,

Радуйся, от соблазн ограждение,

Радуйся, Путеводительнице «Ополченная», верных во бранех Заступление.

 

Кондак 10

 

Спасти хотя человеки, дарова Господь по буре грозной время мирное, да проповестся Евангелие и возродятся храмы Божия, да притекут к Трапезе Святей чада верныя, в жизнь вечную с благодарением вкушающе и благоговейно поюще: Аллилуия.

 

Икос 10

 

Стена Еси девам, Богородице Дево и всем, к Тебе прибегающим, не чтущим же тя – укорение и к обращению воззвание. Мнози бо не восхотеша игу Христову благому главы подклонити, но присно бременем страстей угнетаемии, отвергоша веру истинную или и всуе православных себе именующе, обаче волею согрешающе. Вси же мы далече отстоим заповеди Христовы: «Будьте совершенны, яко Отец ваш Небесный совершен есть». Посему попусти Господь скорби новыя, да вопием к Богоматере с покаянием слезным:

 

Радуйся, смирению научающая,

Радуйся, от падений восставляющая,

Радуйся, в целомудрии и любве укрепляющая,

Радуйся, в заповедех Христовых утверждающая,

Радуйся, благоговеинство подающая,

Радуйся, страхования бесовския и человеческия далече отгоняющая,

Радуйся, Путеводительнице «Ополченная», верных во бранех Заступление.

 

Кондак 11

 

Пение приносим Ти, Пречистая: огради ны от прелести и смущений вражиих, возрасти в страсе Божием и право шествовати ко спасению путем крестным научи, да зовем ти: Аллилуия.

 

Икос 11

 

Светозарною лучею надежды на восставление Царства Православного ведомии, молимся, да возсияет слава Руси Святыя, да распадутся ковы вражии, да поживет Отечество наше во благочестии и да прославляют людие его Тя, Заступницу нашу, рекуще:

 

Радуйся, козни коварных разрушающая,

Радуйся, злу предел полагающая и бессильным его содевающая,

Радуйся, заблуждения, аки дым, рассеивающая,

Радуйся, обидимых заступающая,

Радуйся, правым споборающая,

Радуйся, и паче чаяния пути человек к Богу управляющая,

Радуйся, Путеводительнице «Ополченная», верных во бранех Заступление.

 

Кондак 12

 

Благодать Твоя, Преблагая, да хранит ны присно, егда оскудеют дни века сего и в скорбех последних мир кончатися начнет. Утверди ны в правде Божией и в крепости духа, да возможем сопротив бранем одолети, Сыну Твоему поюще: Аллилуия.

 

Икос 12

 

Поем Твое Рождество, Мати Божия, восхваляем Приснодевство Твое, Пречистая, покланяемся Успению Твоему славному, уповаем на Покров Твой Святый, Тебе души наши вверяем, зовуще:

 

Радуйся, учеников Сына Твоего при Кресте Его усыновившая,

Радуйся, никогоже отвергающая,

Радуйся, о единей душе, аки о всем мире пекущаяся,

Радуйся, терпение малое вечным блаженством утешаюшая,

Радуйся, пути наши с Горних высот зрящая,

Радуйся, подвизающихся подвигом добрым венчающая,

Радуйся, подвизающихся подвигом добрым венчающая.

Радуйся, Путеводительнице «Ополченная», верных во бранех Заступление.

 

Кондак 13

 

О, Всепетая Мати, Рождшая всех святых Святейшее Слово! Нынешнее приемши приношение, от всяких нас бед огради, победы на сопротивныя даруй и в истине стояти утверди, да зовем Ти: Аллилуия.

 

 

 

 

Назад к списку