Акафист Всем Святым женам

Акафист святым женам

 

Кондак 1

Избранныя и верныя служительницы Божия, в естестве немощном подвигом добрым подвизавшияся и мзду добродетелей стяжавшия, Владыку всех молите о чтущих вас любовию и взывающих: радуйтеся, жены святыя, Господеви угодившыя!

 

Икос 1

Ангелов Честнейшая и Архангелов Превысшая, отверзи ми недоуменный ум и язык, да воспою жен святых, путем Твоим шествовавших в любви, вере и смирении, да молитвами их возмогу улучити спасение, хвалебныя глаголы приносяще им:

Радуйтеся, верою, яко щитом огражденныя;

радуйтеся, за веру сию жизнь свою полагавшия.

Радуйтеся, благочестием, яко одеждею, облаченныя;

радуйтеся, благочестие сие трудами велиими возращавшыя.

Радуйтеся, кротостию и смирением паче риз златых украшенныя;

радуйтеся, во смирении сем скорбьми многими укорененныя.

Радуйтеся, целомудрием, аки целомудрием аки каменьми честными сияющия;

радуйтеся, целомудрие сие яко зеницу ока хранившия.

Радуйтеся, молитвою и словом Божиим, аки манною небесною, упитанныя;

радуйтеся, в молитве терпевшия неусыпно.

Радуйтеся, верностию Жениху Небесному, аки перстнем многоценным, себе обручившия;

радуйтеся, верность сию житием и кончиною явившия.

Радуйтеся, жены святыя, Господеви угодившия!

 

Кондак 2

Видящи себе змием обмануту и Создателя прогневившу, токи слез излила еси, о Ево прамати, и скорби земныя смиренно несла еси, в болезнех чад раждающи и мужеви покоряющися. Обаче, пришествия Искупителева чающи, с верою и упованием теплым молитвенно взывала еси: Аллилуиа!

 

Икос 2

Разум земных не разуме, како семя жены сотрет главу змия древняго, род человечь поработившаго, обаче вы, угодницы Божии, в надежде неложней и послушании Закону Господню пребывающе, веру сохраняли есте и чад во благочестии возращали есте, грядущему Искупителю сим путь уготовляющи, темже мы зовем:

Радуйся, Ево, праматерию всех живущих соделавшаяся;

радуйся, покаянием и труды спасение улучившая.

Радуйся, Сарро, господином супруга твоего величавшая;

радуйся, Троице Святей послужити сподобльшаяся.

Радуйся, Ревекко, по воле Божией в страну дальнюю последовавшая;

радуйся, родоначальницею народа Божия соделавшаяся.

Радуйся, Руфе, вере истинной прилепившаяся;

радуйся, во вдовстве и нищете свекровь не покинувшая и бабкою царя-псалмопевца паче чаяния ставшая.

Радуйся, Сусанно целомудренная, чистоту паче жизни сберегавшая;

радуйся, судей лживых не убоявшаяся.

Радуйся, Соломоние мужемудрая;

радуйся, сынов своих даже до смерти лютыя стояти в верности Богу укрепльшая.

Радуйтеся, жены святыя, Господеви угодившыя!

 

Кондак 3

Сила Вышняго разреши неплодство твое, Анно праведная, егда, заматоревши леты и сетующи молитвенно с супругом твоим Иоакимом, внезапу милость Божию улучили есте и родительми Богоматере быти сподобилися есте, в веселии воспевше, благодаряще: Аллилуиа!

 

Икос 3

Имели есте воистину веру несумненную, чистоту голубиную и покорение Господеви неложное, жены святыя, благодать Духа Святаго стяжавшия и сию, аки источницы многоводнии, мирови излиявшия. Прибегающе убо к сей, аки елени на источники водныя, ликующе поем вам:

Радуйся, Анно Иоакимова, по неплодстве многолетнем дивный яблок, Честнейшую Херувим, израстившая;

радуйся, Дщерь возлюбленную из дома роднаго изведшая и во Святая Святых оставльшая.

Радуйся, Елисавето праведная, славу Богоматере предзревшая;

радуйся, мати велия из рожденных женами соделавшаяся.

Радуйся, Анно, дщи Фануилева, в посте и молитве от храма не отходившая;

радуйся, Богомладенца на руце твои трепетно приемшая.

Радуйся, Девора пророчице, дерзновенно веру и народ твой заступившая;

радуйся, Мариамь Моисеева, красно Господеви воспевшая.

Радуйся, Синклитикие преподобная, в трудех пустынных мученически терпевшая;

радуйся, первою из жен тернистый путь подвижничества претекшая и многих на сей подвигшая.

Радуйся, Иустино, трезвением и молитвою крепкою козни вражия, аки дым, рассеявшая;

радуйся, Киприана из сосуда диаволя святителем Божиим соделавшая.

Радуйтеся, жены святыя, Господеви угодившия.

 

Кондак 4

Буря скорби горькия обдержа вас, Мироносицы честныя, егда предстояли есте Кресту Спасителеву, на муки и смерть Его взирающе. Обаче, не убоявшеся прещения и угроз человеческих, ко Гробу Господню зело заутро притекли есте, и радость велию Воскресением Христовым прияли есте, и апостолом принесли сию, поюще, ликовствующе: Аллилуиа!

 

Икос 4

Слышаще, яко воскресе Христос и опусте Гроб, апостоли сумняхуся и недоумеваху, явленьми же Воскресшаго уверение приемше, проповедию всемирною Ему послужиша. С сими же и жены честныя потрудишася, имже хвалу приносим:

Радуйся, Магдалино Марие, духом любве пламенеющи, Тело Иисусово в вертограде просившая;

радуйся, даже до кесаря с вестию Евангельской достигшая.

Радуйся, Иоанно, довольству житейскому следование Христу предпочетшая;

радуйся, от имений твоих Господеви служившая.

Радуйся, Марие, благую часть избравшая;

радуйся, словам спасения внимавшая.

Радуйся, Марфо, трудами Гостю Небесному послужившая;

радуйся, весть о воскрешении Лазаревом первою приемшая.

Радуйся, Марие, мати сынов Зеведеевых;

радуйся, чад своих достойных быти ближними учениками Спасителевыми возрастившая.

Радуйтеся, Сусанно, Саломие и иныя, за Христом верно ходившия;

радуйтеся трудами и имением, словом и смирением Искупителю послужившия.

Радуйтеся, жены святыя, Господеви угодившия.

 

Кондак 5

Боготечныя звезды во тьме беззакония идольскаго явилися есте, мученицы славныя, в телесех немощных лютость гонителей поправшия и сиянием подвига своего многих ко свету веры привлекшия. Ныне же предстоите престолу Божию, в радости нескончаемей поюще: Аллилуиа!

 

Икос 5

Видяще подвиг ваш, ликуем о силе Божией, в немощи, смирением растворенной, славно свершающейся. Обаче плачем и недоумеваем о малодушии своем, не могущем и малыя скорби в терпении понести. Просяще утвердити нас в верности Спасителю, Кровь за ны на Кресте излиявшему, восхваляем вас, вопиюще:

Радуйся, Фекло первомученице, в юных летех апостолу Павлу поледовавшая;

радуйся, житие в служении Христу проведшая и в старости маститей кончину за Него подъемшая.

Радуйся, Екатерино премудрая, знатность, красу и разум свой Господеви смиренно подклонившая;

радуйся, именем невесты Его возвеличенная и на муки, аки на брак светлый, шествовавшая.

Радуйся, Варваро прекрасная, любовь Христову ласке отеческой без сумнения предпочетшая;

радуйся, главу честную под меч, ликующи о Бозе, склонившая.

Радуйтеся, преподобномученицы Анастасие и Февроние, от юности сердца ваша в подвизех иноческих очистившия;

радуйтеся, муки лютыя молитвою крепкою препревшия.

Радуйтеся, царицы Августо и Александро, покой и славу палат украшенных на зной и терпение подвига сменившии;

радуйтеся, славою нетленною во Царствии Небеснем увенчанныя.

Радуйтеся, Софие чадолюбивая со дщерьми Верою, Надеждою и Любовию, себе Господеви уневестившия;

радуйтеся, аки венец красный, себе Христу единомысленно принесшия.

Радуйтеся, жены святыя, Господеви угодившия.

 

Кондак 6

Проповедница богоносная явилася еси, Елено премудрая, Крест Христов обретши и храмы многия по лицу Святыя Земли воздвигши. Посему слышиши от людей верных: Аллилуиа!

 

Икос 6

Воссияла, яко звезда, слава твоя, Елено, царице, апостолам равная, материю первого в государех православных явльшаяся и Гроб Господень мирови открывшая. Предвариша же торжеству сему многая лета тяжкая, в няже смири тя Господь, егда сын твой Константин Диоклитианом аки пленник ят бысть, супруг же по воле деспота тя остави. Подобно и вы, прочия царицы христианския, терпением многим славу свою предварили есте, темже поем вам:

Радуйся, Елено, в летах ветхих бодрость юношескую явившая;

радуйся, во славе царской смирение велие показавшая.

Радуйся, Ирино, почитание честных икон восстановившая;

радуйся, еретиков нечестивых посрамившая.

Радуйся, Ольго Богомудрая, истину Христову Руси явльшая;

радуйся, нечестием сыновним удрученная, обаче верою внука возвеличенная.

Радуйся, Анно Кашинская, супругою и материю мучеников бывшая;

радуйся, крест сей, благодаряще Господа, несшая.

Радуйся, Евфросиние Московская, ризами златотканными вериги подвига вдовства твоего сокрывшая;

радуйся, на конец жития в лике иноческом чудесы дивно просиявшая.

Радуйся, царице Александро Новая, многими скорбьми, поношеньми и болезньми посреде палат царских испытанная;

радуйся, тем усовершившися, с супругом и чады твоими венцем мученическим увязенная.

Радуйтеся, жены святыя, Господеви угодившия.

 

Кондак 7

Хотяще Господеви послужити, всецело себе, яко жертву одушевленную, Ему принесли есте, жены честныя, в молитвах пребывающе и в служении ближним преспевающе, на всяком месте Христу воспевающе: Аллилуиа!

 

Икос 7

Новую тварь узреша в ликах ваших вернии и невернии, дивящеся сему видению неистленнаго сердца человека, не златом и плетением изощренным влас краснаго, но тихостию духа, целомудрием и любовию нетленною. Просяще ходатайства вашего, да и мы, хотя вмале, не чужди пребудем преспеяний сих, восхваляем вас:

Радуйся, Тавифо девице, служению милосердному вдовицам вдавшаяся;

радуйся, по ходатайству их апостолом воскрешенная.

Радуйся, Татиано, в летах младых служением деятельным Господеви угодившая и кровь за Христа излиявшая;

радуйся, дерзновением своим многих от мрака идольскаго отвращшая, к Истине привлекшая.

Радуйся, Олимпиадо, страсти греховныя прежде, нежели оне живы быша, в себе умертвившая;

радуйся, мученичество бескровное в последовании святителю Иоанну Златоусту, от злых гониму, претерпевшая.

Радуйся, Анастасие, прещений супруга нечестиваго не убоявшаяся;

радуйся, раны исповедников омывавшая и на конец сама, аки камением драгим, ранами за Христа украшенная, живот за Него положившая.

Радуйся, Наталие, супруга твоего Адриана на поприще страдальческом укрепившая;

радуйся, верность ему о Господе соблюдшая.

Радуйся, Нино, девою юною из страны своея исшедшая и водительству Богоматере себе вверившая;

радуйся, народ Иверский от тьмы идольския отторгшая и к лозе Церкве Христовы привившая.

Радуйтеся, жены святыя, Господеви угодившия.

 

Кондак 8

Странное чудо явилися есте, девы преподобныя, мир сей и наслаждения его в уметы вменившия и в подвизе постническом себе Христу уневестившия, молитвою, аки цепию златою, с Женихом Небесным себе связавшия и ныне Ему дерзновенно предстательствующия о всем мире, паче же о поющих вам: Аллилуиа!

 

Икос 8

Всех себе Господеви, аки жертву живу, принесли есте, жены преподобныя, ветхаго человека умертвивше, новаго же в себе трудолюбно возрастивше, в молитвах днем и нощию пребывающе, смирением же мудрование мирское попирающе, любовию ко Иисусу Сладчайшему, аки венцем красным, венчающеся. Не дерзающе возвести очес к сияющим благодатию ликам вашим, взываем мы, непотребнии:

Радуйся, Евпраксие, от младенчества себе подвигу покорившая;

радуйся, в немногих летех совершен образ жития преподобническаго начертавшая.

Радуйся, Марие Египтяныня, аки львов дивиих, страсти своя в пустыне поборавшая;

радуйся, заступлением Богоматере в чистоту нетления достигшая.

Радуйся, Евгение, в образе мужеском от родных по плоти сокрывшаяся;

радуйся, последи наставницею сонма дев содеявшаяся и смерть за Господа подъемшая.

Радуйся, Ксение Римляныня, странницею себе сотворшая, во след Христа потекшая;

радуйся, богатство и дом отчий отвергшая, Царствие Небесное стяжавшая.

Радуйся, Евфросиние Суздальская, воле родителевой о браце противитися не дерзавшая, обаче Богоматерь тепло молившая;

радуйся, Тою услышанная и во обитель невест Христовых приведенная.

Радуйся, Александро Дивеевская, начало Четвертому уделу Богоматери по воле Ее положьшая;

радуйтеся, Елено и Марфо девы, послушание даже до смерти простершия и в сонм присных служительниц Пречистыя вошедшия.

Радуйтеся, жены святыя, Господеви угодившия.

 

Кондак 9

Всякое естество человеческое и ангельское недоумением объято бысть, егда видяше, како вы, жены блаженныя, Господеви служисте, безумием мнимым безумие мира обличающе. Вы же, умы чистыми суету земную отринувше, непрестанно Христу взывали есте: Аллилуиа!

 

Икос 9

Витии суемудреннии не вместиша красы нетленныя подвига смиренных, волею Божиею на крест болезней, клевет и мнимаго неразумия вознесенных, и тамо страсти своя, наипаче гордость житейскую, пригвоздивших. Дивящеся высоте сей, взываем мы, пламенем бесовским гордости палимии, тихаго веяния смирения Христова чающии:

Радуйся, Исидоро древняя, преподобие свое мнимым бесчинием сокрывшая;

радуйся, о подвизе сем обличенная и место свое оставльшая;

Радуйся, Марие, во образе инока Марина подвизавшаяся и девою блудною оклеветанная;

радуйся, многая лета в поношении и нищете терпевшая, дитя ея аки свое с любовию возращая.

Радуйся, Ксение, во спасение внезапу преставльшагося супруга твоего зрак буия приявшая;

радуйся, зной и мраз, посмеяния и глад благодушно терпевшая.

Радуйтеся, Параскево, Пелагие и Марие, во обители Дивеевстей просиявшия;

радуйтеся, скорби мнози в житии своем подъемшия.

Радуйся, Матроно Анемнясевская, увечие от родныя матери приявшая;

радуйся, в терпении безропотнем любовь ко Господу и ближним стяжавшая.

Радуйся, Матроно Московская, от рождества своего света солнечнаго лишенная;

радуйся, осияние Солнца Правды Христа в сердце стяжавшая и многих сим просвещшая.

Радуйтеся, жены святыя, Господеви угодившия.

 

Кондак 10

Спасти хотя души ваша, средь мира премирне пребывали есте, жены праведныя, о ближних пекущеся и тем Господеви служаще, молитвою тайно пламенеюще, милосердием же мглу печалей мирских разгоняюще, подвизающе зрящих сие вопити: Аллилуиа!

 

Икос 10

Стеною незримою сташа молитвы ваша, жены честныя, ограждающе вас от молвы житейския. Яве же средь мира пожили есте, чадородием спасающеся и в послушании воле Божией пребываюше, не уклоняющеся ни одесную, ни ошуюю, темже поем вам:

Радуйся, Нонно праведная, кротостию и любовию супруга от тьмы идольския обратившая и чад своих на путь преподобия наставившая;

радуйся, егда супружник твой не токмо христианином, но и епископ бысть, веселящися душею, на путь иноческий ступившая.

Радуйся, Монико блаженная, молитвами слезными сына своего Августина от суеты к любомудрию Христову приведшая;

радуйся, Анфусо кроткая, вдовство свое воспитанию чада посвятившая и святителя великаго Иоанна Златоустаго возрастившая.

Радуйся, Марие, Ксенофонта супруга целомудренная, многа обстояния на чужбине стойко претерпевшая;

радуйся, последи мужеви возвращенная и чад своих Иоанна и Аркадия паки обретшая.

Радуйся, Евпраксие старейшая, бестрепетно дщерь малую единородную по воле ея иночеству посвятившая;

радуйся, вдова сущи, имение свое нищим расточившая и на конец жития обет монашеский принесшая.

Радуйся, Февроние премудрая, со князем Петром образ союза вернаго земли Российстей живописавшая;

радуйся, упованию на Господа супруга своего научавшая.

Радуйся, Иулиание Лазаревская, мати многим чадом бывши и дарования чудес дивно сподобльшаяся;

радуйся, многих в глад напитавшая.

Радуйтеся, жены святыя, Господеви угодившия.

 

Кондак 11

Пение победное воспе сонм ангельский, зряще, како бысте, яко адамант непоколебим, жены святии, с мужами вкупе, егда мнозии в вере поколебашася и мгла нечестия землю Русскую покры. Вы же, Жизнь вечную тлению земному без сумнения предпочетше, на изгнание, заточение и кончину лютую дерзнули есте, верность Христу храняще и поюще Ему, в скорбех благодаряще: Аллилуиа!

 

Икос 11

Светозарною лучею воссияша вам словеса Жениха Небеснаго, рекшаго: «Радуйтеся, егда разлучат вы, и поносят, и пронесут имя ваше, яко зло, Сына Человеческаго ради», и последовали есте, святыя жены времен последних, на муки крестныя за веру святую. Сице взываем вам:

Радуйтеся, царице Александро со дщерьми Ольгою, Татианою, Мариею и Анастасиею, любовию народы земли Российския покрывавшия;

радуйтеся, не оставльшия любви сея, егда злоба вражия на заклание поведе вас.

Радуйся, Елисавето, княгине преподобная, чрез все житие твое слезы страждущих отиравшая;

радуйся, скорбь сердечную убиением супруга возлюбленнаго приемшая, и подвиг свой в день Ангела его мученическим венцем увенчавшая.

Радуйся, Варваро верная, в послушании игумении пребывшая;

радуйся, на пути крестнем ея не оставльши, волею на казнь шествовавшая.

Радуйся, Татиано* милостивая, многим узникам Христовым послужившая;

радуйся, за сие заточение и кончину приявшая.

Радуйся, Евдокие**, подвиги преподобническия юродством Христа ради покрывавшая и страдальчеством увенчавшая;

радуйтеся, Дарие, Дарие и Марие**, путем послушания за материю духовною шествовавшия и на голгофу с нею востекшия.

Радуйтеся, Анно, Матроно и Евфросиние***, во обители Алексеевской лествицею добродетелей иноческих мерно восходившии;

радуйтеся, в пучину мира, беззаконием объятаго, вверженныя, обаче сокровища добродетели не утерявшия, подвигом мученическим сие преумножившия.

Радуйтеся, жены святыя, Господеви угодившия.

 

Кондак 12

Благодать, данную вам от Бога, труды и подвиги ваша никтоже изрещи возможет, многия бо от вас в безвестии подвиг свершиша, единому Господеви ведомыя. Обаче, предстояще Ему присно во славе, воспеваете, сонм велий и сладкогласный составльше: Аллилуиа!

 

Икос 12

Поюще милость Божию, восхождением святых душ ваших явленную, просим молитв ваших, о жены честныя, именованныя и неименованныя, да сподобимся и мы мытарства горькия безбедно миновати и на Страшнем судищи Божием купно с вами да явимся десныя страны стоятелие, взывающе:

Радуйся, Фотино Самаряныня, живою водою словес Христовых напоенная;

радуйся, мужески кровь за возлюбленнаго Учителя пролившая.

Радуйтеся, Галино, Гали, Ирино и Хионие Персидския, по морю, аки посуху шествовавшия;

радуйтеся, стрелами мучителей устреленныя, ко Престолу Господню, аки птицы светлыя, душами возлетевшыя.

Радуйся, Иулие****, в работе горькой в народе чуждем, языческом пленницею житие проводившая;

радуйся, в вере и целомудрии неколеблемо пребывшая и распятие во образ Христов, о мучителех молящися, приявшая.

Радуйся, Марино, никогоже Жениху Христу предпочетшая и крепостию души своея демонов посрамившая;

радуйся, Василиссо, в немощи детской мучителеву ярость осмеявшая.

Радуйся, Параскево преподобная, страны Сербския плод и украшение;

радуйся, Тамаро славная, земли Грузинския дивное утверждение.

Радуйся, Вассо, во основание обители Печерския мощами нетленными положенная;

радуйся, Марие, рождением Сергия преподобного возвеличенная.

Радуйтеся, жены святыя, Господеви угодившия.

 

Кондак 13

О, жены святыя, Господеви угодившия: мученицы и преподобныя, блаженныя и праведныя, пророчицы и равноапостольныя! Поюще подвиги ваша, молим мы, недостойнии, да ходатайством вашим улучим спасение и пети сподобимся в вечном веселии: Аллилуиа!

 

Молитва

О, жены святыя, в житии своем верность Господеви явившия и благодатию Его победу над страстьми мира сего и кознями вражиими улучившия! На путех жития вашего шествовали есте ко Христу, веру сохраняюще, в послушании Закону Божию пребывающе, в молитве и любве преспевающе! Молитеся о нас, убогих, не стяжавших добродетелей ваших, ко Всемилостивому Владыце, да подаст нам дух вашей ревности, да вразумит, како житие провождати, не уклоняющеся от пути спасительнаго, и да помилует нас, недостойных, да купно с вами прославим Отца и Сына и Святаго Духа во веки. Аминь.

 

Тропарь, глас 4

Агницы Христовы словесныя, /

В преподобиии правде свято пожившия,/

жены честныя,

/ведомыя и неведомыя угодницы Христовы,/

равноапостольныя проповедницы и страстотерпицы,/

преподобныя и праведныя,/

Владыку всех молите/

Мир и милость нам даровати//

и спастися душам нашим.

 

Кондак, глас 3

Праматери Евы дщери праведныя/

кротостию, любовию и молитвами Тебе, Христе, угодиша,/

тех молитвами в мире глубоце/

Церковь Твою соблюди, Жизнодавче,/

Супружества укрепи, девствующих управи,/

Старыя поддержи, юныя настави/

И всех нас ко спасению приведи,//

Господи Многомилостиве!

 

 

Примечания:

* мученица Татиана Гримблит

** преподобномученицы из села Суворово (Пузо) Нижегородской обл., что близ Дивеева, Евдокия, Дария, Дария и Мария

*** преподобномученицы Московского Ново-Алексеевского монастыря сестры Анна и Матрона (Макандины) и Евфросиния

****мученица Иулия Карфагенская, память ея 16 июля (29 по н.ст.)

Назад к списку